ဒေါ်လာ ၁.၃ သန်းတန်တဲ့ ကမ္ဘာ့ ဈေးအကြီးဆုံး ရေမွှေး
ဧပြီ - ၁၃၊ ၂၀၁၉
အရည်အသွေးမြင့် ရေမွှေးတွေကို ဈေးကြီးကြီး ပေးဝယ်ရတာ မဆန်းပါဘူး။
ဒါပေမဲ့ Shamukhကတော့ ကမ္ဘာပေါ်မှာ တန်ဖိုးအကြီးဆုံး ရေမွှေးလို့ ညွှန်းဆိုနိုင်ပါတယ်။
ဒီစကားလုံးဟာ အာရပ် ဝေါဟာရဖြစ်ပြီး အမြင့်ဆုံးအဆင့်နဲ့ ထိုက်တန်ခြင်းလို့ အဓိပ္ပါယ် ရပါတယ်။
စုစုပေါင်း ၃ လီတာပဲရှိတဲ့ ရေမွှေး အရည်ကို ရရှိဖို့ သုံးနှစ် အချိန်ယူ ထုတ်လုပ်ခဲ့ရပါတယ်။ သုတေသန စမ်းသပ်မှုတွေ ၄၉၄ ကြိမ် ပြုလုပ်ခဲ့ရပါတယ်။
ဒီရေမွှေးကို အီတလီထုတ် Murano ပုံဆောင်ခဲ ပုလင်း အကောင်းစားထဲ ထည့်ပြီး ဒေါ်လာ ၁.၃ သန်းနဲ့ ရောင်းချထားပြီး ဖြစ်ပါတယ်။
ပုလင်းပေါ်မှာတော့ အာရပ်ရိုးရာ မြင်းရိုင်းတွေ၊ နှင်းဆီပွင့်တွေ ထုဆစ်ထားပြီး ရွှေသိန်းငှက်တစ်ကောင်နဲ့ ကမ္ဘာလုံးပုံတွေ ထည့်သွင်း အလှဆင်ထားပါတယ်။
အဲဒီပုလင်းကြီးမှာ စုစုပေါင်း ၃၈.၅၅ ကာရက် အလေးချိန်ရှိတဲ့ စိန်ပွင့် ၃၅၇၁ ပွင့် စီခြယ်ထားပါတယ်။
ပုလဲလုံးကြီးတွေ၊ ၂.၅ ကီလိုဂရမ် လေးတဲ့ ၁၈ ကာရက် ရွှေပြားတွေနဲ့ ၅.၉ ကီလိုဂရမ် လေးတဲ့ ငွေသားသတ္တုတွေကိုလည်း ထည့်သွင်း တန်ဆာဆင်ထားပြန်ပါသေးတယ်။
တန်ဖိုးကြီး ရေမွှေး အမှတ်တံဆိပ် Nabeelရဲ့ လက်အောက်ခံ The Spirit of Dubaiက Shamukhရေမွှေးကို ဖန်တီးခဲ့တာ ဖြစ်ပါတယ်။
ကမ္ဘာအနှံ့က အမွှေးနံ့သာ အမျိုးအစား ပေါင်းစုံကို ယူဆောင်လာပြီး ဒီရေမွှေးအတွက် ထည့်သွင်း ပေါင်းစပ်ထားကြောင်း ကုမ္ပဏီက ကြေညာပါတယ်။
စန္ဒာကူး အနှစ်တွေ၊ တူရကီ နှင်းဆီတွေ၊ အိန္ဒိယ သစ်မွှေးတွေ၊ တိဘက်က ကတိုးသမင်တွေ အပါအဝင် အကောင်းဆုံး ကုန်ကြမ်း ရင်းမြစ်တွေကို ဒီရေမွှေး ဖော်စပ်ရာမှာ အသုံးပြုထားပါတယ်။
ဒီရေမွှေးကို ဘယ်သူက မှာယူခဲ့သလဲ ဆိုတာကိုတော့ မကြေညာသေးပါဘူး။ Shamukh ရေမွှေးပုလင်းကို မတ်လကုန်ထိ ဒူဘိုင်းမှာ ခမ်းခမ်းနားနား ပြသထားခဲ့ပါတယ်။
No comments:
Post a Comment