အောက်တိုဘာ ၁၂ ရက်နေ့က မြစ်ကြီးနား အကျဉ်းထောင်မှ လွတ်မြောက်လာပြီးနောက် မီဒီယာများတွင် ပြောကြား ခဲ့သော နိုင်ငံကျော် လူရွှင်တော် ဇာဂနာ၏ နိုင်ငံရေး ပျက်လုံးများကို စုစည်း တင်ပြလိုက်ပါသည်။
မီးဖိုမှာချက်တယ်
“နောက်အင်တာနက်ပုဒ်မ အားလုံး အင်တာနက် သုံးတဲ့သူတွေပါ။ ဒီအင်တာနက် ပုဒ်မမှာ ကျနော့်ကို အမိန့်ချတဲ့ တရားသူကြီးက အင်တာနက်ဆိုတာ မသိဘူး။ ရယ်စရာ ဘယ်လောက်ကောင်းလဲဆို ခင်ဗျား မိုးသီးဇွန်တို့၊
အောင်ဒင်တို့နဲ့ ဘယ်မှာချက်လဲဆိုတော့ မီးဖိုမှာ ချက်တယ်လို့ ပြောတယ်။ စိတ်ဆိုးတယ်။ Meebo ဆိုတဲ့
ဝက်ဆိုက်က နာမည်လို့ ပြောတာ၊ ညနေမှ ကျနော်မသိလို့ပြောမိတာတဲ့။ ကွန်ပျူတာတောင် မကိုင်ဘူးတဲ့
အဲလိုလူက အမိန့်ချတာ”
Gmail မဟုတ် Email
“အစိုးရရှေ့နေက တရားရုံးမှာ ကိုဇာဂနာ ရှင့် Email ပြောတဲ့။ thura61@gmail.com ပေးတော့ ကျမ ပြောနေတာ အီးမေးလ် နော် … ဂျီမေးလ် မဟုတ်ဘူးတဲ့။ အဲလို ဘာမဟုတ်တဲ့ အမှုတွေအတွက် ကျနော်သုံးနှစ်ကျော်နေရတာ များတောင် များသေးတယ်”
Yangon Press International အောက်တိုဘာ ၁၂ ရက်၊ ၂ဝ၁၁ ခုနှစ်
ရောင်စုံဘောလုံး လေးဖြူဆိုသလို
“သမ္မတလည်း ပြောထားတဲ့စကားရှိတယ်လေ။ အဲဒီပြောထားတဲ့ စကားတွေထဲမှာ အမျိုးသားရင်ကြား ပြန်စေ့ရေးတို့၊ အမျိုးသား ပြန်လည် သင့်မြတ်ရေးတို့ ဆိုပြီး ပြောပြီးတော့ အခုလို လွတ်ငြိမ်းချမ်းသာခွင့် ပေးလိုက်တဲ့ အခါကြတော့ ဘာနဲ့တူသလဲဆိုတော့ လေးဖြူကို ရောင်စုံဘောလုံး သီချင်းဆိုခိုင်းသလိုဖြစ်သွားတယ်။ လေဖြတ်နေတဲ့ မယ်ကြီး
အိုကြီးကို မိတ်ကပ်လိမ်း လွှတ်လိုက်သလိုပဲဗျာ။ ဘာမှကို ခံစားချက်က ပြောရမှန်းကို မသိလောက်အောင် ဆိုးတယ်”
BBC- မြန်မာပိုင်းအစီအစဉ် - အောက်တိုဘာ ၁၂ ရက်၊ ၂ဝ၁၁ ခုနှစ်
မုန်တိုင်းကို ခဏရပ်ခိုင်းဖို့
“ကျနော့်ကိုချတော့ Video Act ဆိုတာပါတယ်။ အဲဒီ Video Act က ဘာလို့ သုံး နှစ်ချလဲလို့ ကျနော်မေးတော့
နာဂစ် မုန်တိုင်း ဓါတ်ပုံပါလို့တဲ့။ မုန်တိုင်းတိုက်တာနေတာ ဘာလို့လဲ။ ဆင်ဆာမတင်လို့တဲ့။ မုန်တိုင်း တိုက်တာ
ကို ဆင်ဆာ တင်ရဦးမှာလား။ ကျနော်ပြောတာ မုန်တိုင်းတိုက်တဲ့ အလုပ်ကို ခဏရပ်ထားဦး ရိုက်ကူးရေး သွားတင် ပါရစေဦးလို့ ပြောလို့မရဘူးလေ”
Yangon Press International အောက်တိုဘာ ၁၂ ရက်၊ ၂ဝ၁၁ ခုနှစ်
ဆိုမာလီဓါးပြလို
“စောစောပိုင်းကတော့ ရှိတယ်ဗျ။ ဒီနေ့လွတ်တဲ့ အပေါ်မှာ မူတည်ပြီးတော့ မရှိတော့ဘူး။ သိပ်ပြီးတော့ အားမရဘူး။ သိတဲ့အတိုင်းပဲလေ။ တို့တိတို့တိနဲ့ လုပ်တာ ကျနော်တို့က ဆိုမာလီ ဓါးပြတွေ အဖမ်းခံရတဲ့လူလို ဖြစ်နေတယ်။ ကျနော်တို့ကို ဘာနဲ့ပြန်ရွေးရမလဲ အဲလိုဖြစ်သွားပြီ။”
မဇ္ဈိမ - အောက်တိုဘာ ၁၂ ရက်၊ ၂ဝ၁၁ ခုနှစ်
အတိုးနှုန်းပြောင်းတဲ့ လွတ်ငြိမ်းချမ်းသာခွင့်
“သမ္မတကြီးရဲ့ မေတ္တာစေတနာနဲ့ တနှစ် လျော့သွားတော့ ၃၄ နှစ်ပေါ့။ အခု သုံး နှစ် ငါး လ နေရတော့ Ten Percent ပေါ့၊ ဘဏ်က အခု အတိုးနှုန်း ပြောင်းသွားတယ်မို့လား Ten percent ။ အဲဒီထဲ ကျနော် ပါသွားတာပေါ့”
RFA - မြန်မာပိုင်း အောက်တိုဘာ ၁၂ ရက်
အသီးပုပ်များနှင့် ဂေါ်ပြား
“အသီးနှစ်သီးရော ဂေါ်ပြားရော ရှိတယ်။ နှစ်သီးလုံးက ပုပ်နေတော့ ဂေါ်ပြားပေါ်တာပေါ့။ ဒီသဘောပါပဲ။ ကျနော် သူတို့နဲ့လည်း မဆွေးနွေးရသေးဘူး။ တခြားလူတွေနဲ့သာ စကားပြောနေ ရတာ။ သူတို့ကိုလည်း ပွင့်ပွင့်လင်းလင်း
မေးစရာရှိတာမေးရဦးမယ်။ ကျနော်မကြိုက်ဆုံးစကားက သူတို့ရဲ့ အင်တာဗျူးထဲမှာ ပါတဲ့ ပြည်ပမှာရှိတဲ့ နိုင်ငံရေး သမားတွေနဲ့ ပတ်သက်ပြီးတော့ သူတို့ပြော တဲ့စကားကို ကျနော် မကြိုက်ဆုံးပဲ။ အဲဒါနဲ့ပတ်သက်ပြီးတော့ သူတို့ကို ပွင့်ပွင့်လင်းလင်း မေးရမယ်။ ကျနော့်စိတ်ထဲမှာ မကျေနပ်ရင်လည်း သူတို့ကို အမွေဖြတ်ဖို့ ဝန်မလေးပါဘူး။”
DVB - အောက်တိုဘာ ၁၂ ရက်၊ ၂ဝ၁၁ ခုနှစ်
“ပြက်လုံးတော့ မပြောဘူးဗျို့။ သီးလေးသီးတွေ ခိုးချသွားမှာ ကြောက်လို့။”
RFA- မြန်မာပိုင်း၊ အောက်တိုဘာ ၁၂ ရက်၊ ၂ဝ၁၁ ခုနှစ်
အားထားဖွယ်ရာ စတုတ္ထမဏ္ဍိုင်
“ပြောရေးဆိုခွင့် ရတယ်ပြောတာပဲ သတင်းစာတွေ၊ ဂျာနယ်တွေထဲမှတွေ့တာတော့ စတုတ္ထမဏ္ဍိုင်၊ စတုတ္ထမဏ္ဍိုင် လို့ပြောတာပဲ။ ကျနော်သိသလောက်တော့ အဲဒီ့ စတုတ္ထမဏ္ဍိုင်ဆိုတာ ဘာလဲလို့ လေ့လာတော့ စတုတ္ထမဏ္ဍိုင် ဆိုတာ ပြန်ကြားရေး ဝန်ကြီး ဖြစ်နေတာကိုးဗျ”
BBC- မြန်မာပိုင်း၊ အောက်တိုဘာ ၁၂ ရက်၊ ၂ဝ၁၁ ခုနှစ်
မြန်မာ့ လွှတ်တော်အမတ်
"အိုင်စတိုင်းနဲ့ လူ လေးယောက်နဲ့ တွေ့တယ်။ တွေ့တဲ့အခါကျတော့ တယောက်က စပြောတယ်။ ဟာ ... အိုင်စတိုင်း
ရေ၊ ကျနော်ကတော့ ကျနော့်ရဲ့အိုင်ကျူက ၁၈ဝ ရှိတယ်ဗျတဲ့။ အဲဒီတော့ အိုင်စတိုင်းက လက်ဆွဲနှုတ်ဆက်ပြီး
ကောင်းပါပြီ မိတ်ဆွေ၊ ခင်ဗျားနဲ့ကျနော်နဲ့တော့ Quantum Physics (ကွမ်တန်သီအိုရီ ရူပဗေဒ) အကြောင်း ကျနော်တို့ ဆွေးနွေးကြတာပေါ့တဲ့။”
“နောက်တယောက်က ကျနော်ကတော့ အိုင်ကျူ ၁၅ဝ ပဲရှိတယ်၊ အိုင်စတိုင်းဆိုတော့၊ ဟာ ... ကောင်းပြီဗျာတဲ့၊ ခင်ဗျားနဲ့ကျနော်တို့ နောက်ဆုံးပေါ် သင်္ချာသီအိုရီတွေ ဆွေးနွေးကြတာပေါ့တဲ့။ နောက်တယောက် ထပ်ပြောတယ်။ ကျနော်ကတော့ ၁၂ဝ ပဲရှိတယ်ဗျတဲ့။ ဟာ ... ခင်ဗျားနဲ့ကျနော်နဲ့ ရုပ်ရှင်အကြောင်း ဆွေးနွေးမယ်တဲ့။”
“နောက်ဆုံးလူကကျတော့ ထပြောတယ်။ မျက်နှာလေးက ပျက်လို့။ အိုင်စတိုင်းရေတဲ့၊ ကျနော်ကတော့ အိုင်ကျူ
၅ဝ ပဲ ရှိပါတယ်ဗျားတဲ့။ ဟား ... ဝမ်းသာသွားတယ် အိုင်စတိုင်းက။ အဆင်ပြေလိုက်တာဗျာ၊ ခင်ဗျား လွှတ်တော်
ထဲမှာ ဘာတွေတင်ပြခဲ့သလဲတဲ့”
VOA မြန်မာပိုင်း၊ အောက်တိုဘာ ၁၂ ရက်၊ ၂ဝ၁၁ ခုနှစ်
နေတိုး မလုပ်နဲ့ ပြေတီဦးလုပ်
“တိုင်းပြည်မှာရှိတဲ့ နိုင်ငံရေးနဲ့ ပတ်သက်သူတွေအားလုံးကို တခုတော့ ပြောချင်တယ်ဗျာ။ အဲဒါကတော့ ‘နေတိုး’ တွေ မလုပ်ကြပါနဲ့၊ ‘ပြေတီဦး’ တွေ လုပ်ကြပါလို့၊ အဲဒါ ပြောချင်တယ်။ ‘နေတိုး’ ဆိုတာ NATO ‘No Action- Talk Only’ စကားတွေချည်းပဲ ပြောပြီး ဘာအလုပ်မှ မလုပ်တဲ့ ဟာတွေ မလုပ်ကြပါနဲ့။ ‘ပြေတည်ဦး’ တွေ လုပ်ကြပါ။ တိုင်းပြည် တည်ထောင်ဖို့အတွက်ကို ကျနော်တို့ ဦးခေါင်းထဲ ထည့်ပြီး ဦးတိုက်လုပ်ကြပါ၊ အဲဒါ ပြောချင်ပါတယ်။”
RFA မြန်မာပိုင်း အောက်တိုဘာ ၁၂ ရက်၊ ၂ဝ၁၁ ခုနှစ်
Ref:Mizzimabirese
No comments:
Post a Comment