ပုဂံမြို့နှင့် ပတ်ဝန်းကျင်ဒေသ၌ မျက်နှာများ ရောင်ယမ်းသော ရောဂါဆန်းတစ်မျိုး ပျံ့နှံ့ကူးစက်နေ (ပြည်တွင်းကူးစက်ရောဂါဆိုင်ရာ အထူးသတင်း)

ပုဂံ၊ ဧပြီ ၇

မန္တလေးတိုင်းဒေသကြီးအတွင်းရှိ မြန်မာ့ရှေးဟောင်း ယဉ်ကျေးမှု မြို့တော် ပုဂံ၌ ထူးဆန်းသော ကူးစက်ရောဂါတစ်မျိုး ပျံ့နှံ့ဖြစ်ပွားနေကြောင်း သတင်းရရှိသည်။ အဆိုပါ ရောဂါဖြစ်ပွားမှုကို ယခုနှစ် ဖေဖော်ဝါရီ လကုန်ပိုင်းက စတင်တွေ့ရှိခဲ့ရပြီး မတ်လတွင်းမှ စ၍ ကူးစက်ဖြစ်ပွားနှုန်း များလာကာ ယနေ့အထိ ဖြစ်ပွားလျက် ရှိနေကြကြောင်းကို တွေ့ရသည်ဟု မြို့ခံများက ဆိုကြသည်။

ရောဂါလက္ခဏာများ အနေဖြင့် မော်နာဖြင့် ခပ်ဆင်ဆင် တူပြီး ပါးချိတ်နေရာမှ စတင်ရောင်ယမ်းလာပြီး ကျန်သော မျက်နှာ တစ်ခုလုံးနှင့် ဦးခေါင်းရှိ ကြွက်သားများ ရောင်ယမ်းခြင်း၊ ဖျားနာခြင်း တို့ ခံစားရကြောင်း၊ ခန္ဓာကိုယ်၏ မည်သည့် နေရာတွင်မှ ဝေဒနာ တစ်စုံတစ်ရာ မဖြစ်ပေါ်ဘဲ မျက်နှာ တစ်ခုတည်းသာ ရောင်ယမ်းကြောင်း၊ ရောင်ယမ်းမှု အရမ်းဆိုးလာချိန်၌ မျက်နှာသည် လေးထောင့်ပုံသဏ္ဍာန် ဖြစ်သွားသောကြောင့် ဆယ်ပြားစေ့ရောဂါ/ ၀က်မျက်နှာနှင့် တူသွားသောကြောင့် ၀က်ရောဂါဟု လည်းကောင်း ဒေသခံ အချို့က နောက်ပြောင် ခေါ်ဆိုနေကြကြောင်း၊ နာကျင်မှုသည် လဲလျောင်းသော ကိုယ်အနေအထား၌ ပိုဆိုးသည်ဟု လူနာများက ပြောကြကြောင်း၊


ပြည်ပမှ Mumps ခေါ်ပါးချိတ်ရောင် ရောဂါ (မော်နာ) ဖြစ်ပွားသူ တစ်ဦး၏ပုံ

ဆေးခန်းများတွင် အဆိုပါရောဂါကြောင့် လာပြသူ အတော်များနေကြောင်း၊ တစ်ယောက်ဖြစ်လျှင် အတူနေ မိသားစု အားလုံးနီးပါး ဖြစ်ကြကြောင်း၊ လူကြီးလူငယ် မရွေး ဖြစ်ပွားနေကြသော်လည်း လက်ရှိအနေအထား၌ ထိုရောဂါကို ရောင်ယမ်းမှုနှင့် အဖျားကျဆေး၊ ပိုးသတ်ဆေးများဖြင့် ကုသနိုင်နေပြီး လူအသေအပျောက် မရှိကြကြောင်း၊ ဆေးရုံတက်ရသူလည်း မရှိသေးကြောင်း ပုဂံမြို့၌ ဆေးခန်းဖွင့်ထားသူ အထွေထွေ ရောဂါကု ဆရာဝန်တစ်ဦးက mmDailyNews သို့ သတင်းပေး ပြောဆိုသည်။

တိုက်ဆိုင်စွာပင် ပုဂံနှင့် ပတ်ဝန်းကျင် မြို့များ အပါအ၀င် မြန်မာပြည် အထက်ပိုင်း ဒေသများ၌ ၀က်နားရွက်ပြာ ရောဂါ ပျံ့နှံ့ ဖြစ်ပွားနေရာ အဆိုပါ ထူးဆန်းသော ရောဂါသည် ၀က်မှ လူသို့ ကူးစက်ခြင်း ဖြစ်နိုင်ကြောင်း မြို့ခံအချို့က ဆိုကြသော်လည်း အစိုးရ၏ တိရိစ္ဆာန်မွေးမြူရေးနှင့် ကုသမှု ဦးစီးဌာနက ၀က်နားရွက်ပြာ ရောဂါသည် လူသို့ ကူးစက်ခြင်း လုံးဝမရှိသေးကြောင်း ထုတ်ပြန်ခဲ့သည်။

mmDailyNews မှ ရန်ကုန်-ပုဂံ ခရီးသည်ပို့ဆောင်ရေး ယာဉ်လိုင်းတစ်ခုသို့ အဆိုပါ ကိစ္စနှင့် စပ်လျဉ်းပြီး မေးမြန်းစုံစမ်းကြည့်ရာ ဖုန်းလက်ခံ ဖြေကြားသူက ၄င်းတို့ အနေဖြင့်တော့ မကြားမိပါကြောင်း၊ ရန်ကုန်ရုံးခွဲတွင်သာ အနေများပါကြောင်း၊ မကြာခင်ကျရောက်တော့မည့် မဟာသင်္ကြန်ကာလ နှစ်သစ်ကူး ရုံးပိတ်ရက်များတွင် ပုဂံသို့ ပြည်တွင်းပြည်ပ ခရီးသည်များ သွားရောက်အပန်းဖြေကြရန် စီစဉ်ထားမှုများလည်း များပြားစွာ ရှိနေပြီး ဖျက်သိမ်းသည်ဟု မကြားမိပါကြောင်း ထိန်းထိန်းသိမ်းသိမ်း ဖြေကြားခဲ့သည်။


ပုဂံမြို့ရှိ ဆိုက်ကားဂိတ်တစ်ခု
ထိုကူးစက်ရောဂါသည် မည်သည့်ပိုးကြောင့် ဖြစ်ရသနည်း ဆိုသည့်အချက်ကို ကျန်းမာရေး ၀န်ကြီးဌာနမှ အထူးအဖွဲ့ စေလွှတ်၍ စုံစမ်းစစ်ဆေး ကုသသင့်ကြောင်း၊ ရောဂါအသစ်ဟု အများက ယူဆနေကြသော်လည်း မြန်မာနိုင်ငံ၌ ဖြစ်လေ့ဖြစ်ထ မရှိသော စာရင်းရှိပြီးသား ရောဂါတစ်ခုခုလည်း ဖြစ်နေနိုင်ကြောင်း၊ ကမ္ဘာလှည့် ခရီးသည်များ ဆီမှ ပါလာခြင်းလည်း ဖြစ်နိုင်ကြောင်း၊ တစ်နိုင်ငံလုံး ပျံ့နှံ့ကူးစက်သွားနိုင်သော ကပ်ရောဂါအဖြစ်သို့ ရောက်မည် မရောက်မည်ကို မည်သူမျှ မပြောနိုင်သောကြောင့် ကြိုတင် စုံစမ်းစစ်ဆေး ကာကွယ်ကုသမှုများကို ပြုလုပ်သွားရန် မျှော်လင့်ပါကြောင်း၊

ကြားသိရသော သတင်းများနှင့် ပုဂံမြို့ရှိ ကျန်းမာရေး ပညာရှင်များ၏ ပြောပြချက်များ အရ ဝေဒနာသက်သာအောင် ကုသမှုများ (Symptomatic Treatment) ပေးရုံဖြင့် ရက်အနည်းငယ်အတွင်း ပျောက်ကင်း သက်သာသွားပြီး တိုး၍ ဆိုးမလာသော သဘာဝ (Self-Limiting Nature) ရှိခြင်း၊ အသက်အန္တရာယ် မရှိခြင်း၊ တစ်ကြိမ်ဖြစ်ပြီးသူသည် ပြန်ဖြစ်သည်ဟု မကြားရခြင်းတို့ကြောင်း ဘက်တီးရီးယားပိုး ကူးစက်မှုထက် ရှောင်တခင် ဗိုင်းရပ်စ်ပိုး ကူးစက်မှုတစ်မျိုး (Acute Viral Infection) ဖြစ်မည်ဟု ယူဆကြောင်း၊ ဗိုင်းရပ်စ်များသည် သဘာဝအရ မျိုးရိုးဗီဇအသွင်ကို ၄င်းတို့ဘာသာ ခဏခဏ ပြောင်းလဲ ဖွဲ့စည်းတတ်ကြပြီး အသစ်ပေါ်လာသော မျိုးကွဲပုံစံများသည် ရောဂါအသစ်များကို ဖြစ်ပေါ်စေတတ်ကြောင်း၊ ယနေ့ကမ္ဘာကြီး၏ ရာသီဥတု ပြောင်းလဲဖောက်ပြန်လာမှုကြောင့် မြန်မာနိုင်ငံ အလယ်ပိုင်းဒေသတွင် ဗိုင်းရပ်စ်အသစ်များ ဖြစ်ပေါ်လာခြင်း ဖြစ်နိုင်ကြောင်း အဆိုပါ ကူးစက်ရောဂါ နှင့် စပ်လျဉ်း၍ mmDailyNews ၏ အယ်ဒီတာ ဒေါက်တာသီဟသစ်က သူ၏ အမြင်ကို ပြောပြခဲ့သည်။


ထို့အပြင် ကိုသီဟသစ်က ၄င်းအနေဖြင့် အဆိုပါ ရောဂါနှင့် ပတ်သက်၍ ဆေးပညာအကိုးအကားများ ရှာဖွေ လေ့လာနေသလို ပြည်တွင်းနှင့် ပြည်ပရောက် မြန်မာဆရာဝန်များနှင့် ကမ္ဘာ့ထိပ်တန်း ကျန်းမာရေးဝက်ဘ်ဆိုက် ဆယ်ခုအပါအ၀င် ဖြစ်သော Mercola.com နှင့် WebMD.com ဆိုက်နှစ်ခုမှ ကျန်းမာရေး ပါရဂူများဆီသို့ အီးမေးလ်ပေးပို့ အကြံဥာဏ်တောင်းခံထားကြောင်း၊ တိကျသေချာသော အချက်များ စုဆောင်းမိပါက ဆောင်းပါးအသွင်ဖြင့် တင်ဆက်ပေးသွားမည်ဟု ထပ်လောင်း ပြောကြားခဲ့သည်။

Written by : ရဲဘုန်းမင်း Last Updated at 2011-04-07 on 02:21:27- mmdailynews